الرئيسية » ربح من الانترنت » حاسس إنك تايه بخصوص فكرة الربح من الإنترنت؟ (اقرأ المقال ده)


حاسس إنك تايه بخصوص فكرة الربح من الإنترنت؟ (اقرأ المقال ده)

تايه بخصوص فكرة الربح من الانترنت؟

فكرة الربح من الإنترنت دي حيرت ناس كتير 😕 أوي مش انت بس، طرق ومعلومات وأسرار وأرباح بآلاف الدولارات… حاجات كتير جداً بتشوفها أو تسمع عنها تخلي أي حد يحتار، بس خلينا نبص شوية كدة على الحيرة دي.

من خلال خبرتي المتواضعة أنت واحد من الناس دول:

  • مش عارف أصلاً ايه هو الربح من الإنترنت، وإيه هي الفرص المتاحة عليه.
  • انت عارف كويس طرق الربح من الإنترنت، ولكن تايه شويتين ومش عارف تختار الطريقة أو المجال اللي يناسبك.
  • انت محتار بين كام طريقة للربح، وبتقارن بينها من حيث الأرباح وسهولة التطبيق وعايز تختار الأحسن ليك.
  • عندك مهارة أو خبرة معينة أو شغف وحابب تستغل ده في الربح من الإنترنت.
  • انت عايز تعمل فلوس من على النت بأضمن وأسرع طريقة أياً كانت.

اياً كان بقى انت مين فيهم… إن شاء الله مش هتخرج من المقال ده إلا وانت عارف إيه اللي لازم تعمله علشان تربح من الإنترنت 🤑🤑.

المهم بس انا عايزك تعمل كام حاجة مهمين جداً علشان تستفيد من الوقت البسيط اللي هتقضيه معايا هنا:

  • ركز كويس جداً في كل كلمة في المقال.
  • اقرأ المقال كله متجريش على العناوين وبس.
  • خلي بالك من اللينكات اللي هتلاقيها في المقال، لأن فيها معلومات وأدوات كتيرة جداً هتساعدك بشكل عملي.
  • اقرأ المقال كله الأول، وبعد كدة ابقى أرجع لأي جزء علشان تنفذ أي خطوات عملية فيه أو تفتح أي لينكات أنت مهتم بيه.

اتفقنا 🙏؟ … يلا بينا نبدأ 👇!

طرق الربح من الإنترنت

في  طرق كتيرة جداً للربح من الإنترنت، بس خليني أعرفك على مجالات الربح بشكل عام علشان تاخد فكرة وتبقى شايف الصورة كاملة.

1- مجال صناعة المحتوى الرقمي

المحتوى المقصود بيه أي حاجة انت بتستهلك وقتك عليها على الإنترنت زي:

  • المقالات
  • الصور
  • الفيديوهات
  • البودكاست
  • الكتب الإلكترونية

طيب الناس بقى اللي بتصنع المحتوى ده، يا ترى بتكسب منه ازاي… خليني أجاوبك في النقط اللي جاية بسرعة كدة:

الربح من الإعلانات

شايف الإعلانات اللي موجودة هنا وانت بتقرأ المقال ده، دي طريقة من طرق الربح، ومثال تاني هو الإعلانات اللي بتشوفها وانت بتتفرج على فيديوهات يوتيوب.

الربح من التسويق بالعمولة

مش بتاخد بالك كدة وانت بتتفرج على منشور على انستجرام وبتلاقي حد بيرشحلك منتج معين، و بيديلك لينك علشان تضغط عليه في الستوري… ده غالباً لينك علشان ياخد عمولة من الشركة لما تشتري منها.

الربح من ترويج الخدمات

مش بتشوف ناس بتنشر صور لرسومات أو دكاترة بتنشر محتوى علشان تقدم شوية نصائح للناس أو خبيرة تجميل بتقول وصفات للبنات.

كل الناس دي بقى بتنشر محتوى وبتفيد الناس، وفي نفس الوقت بتروج للخدمات بتاعتها، الدكتور هتلاقيه بيقدم استشارات وكشف، والخبيرة بتعمل جلسات تجميل أو ممكن تكون بتبيع منتجات تجميل… فهمت الفكرة؟

طبعاً أنت أكيد عايز تعرف تبدأ ازاي بكل طريقة من الطرق اللي فاتت دي… متقلقش هقولك على كل حاجة في وقتها، خلينا نكمل بس.

2- مجال التجارة الإلكترونية

أكيد شفت كمية المتاجر اللي بقت موجودة أونلاين – ده طبعاً غير المتاجر الكبيرة زي جوميا و سوق و نون وغيرهم – وكمان غير طرق تانية زي:

  • البيع عن طريق متجر فيسبوك (Facebook Marketplace).
  • البيع عن طريق صفحات الفيسبوك وانستجرام.
  • البيع عن طريق التيليجرام و الواتساب اللي بقت منتشرة جداً.

التجارة الإلكترونية دي مجال حلو جداً جداً لو كنت:

  • معاك رأس مال و لو بسيط.
  • بتحب تتعامل مع الناس وتسوق ليهم.
  • قدامك فرصة كويسة تنفع تشغل فيها دماغك (يعني ليك صاحب بيصنع حاجة في ورشة ممكن تساعده وتسوق منتجاته على النت – قدامك فرصة تشتري منتجات بسعر رخيص جداً… وهكذا.
  • لو كنت بتصنع أو بتعمل أي حاجة بنفسك (مشغولات يدوية – اكسسوارات – منتجات خشبية) وغيرها.
  • إن كنت فعلاً عندك محل تجاري أو بتسوق على الأرض كدة بين الناس… ساعتها بقى ممكن تستغل الإنترنت انك تكبر شغلك وتجيب عملاء جديدة.

التجارة الإلكترونية كمان في آخر عشر سنين ظهر فيها مجال كدة اسمه الدروب شيبينج، والفكرة بتاعته أنك بتبيع منتجات موجودة في متاجر كبيرة للعملاء بتوعك، لكن بسعر أعلى وانت اللي بتحدده.

بس مبتتعبش نفسك في التوصيل أو الشحن وغيره، عملية البيع بتم بشكل كامل من خلال المتجر الكبير اياه.

بس خلي بالك دي طريقة محتاجة كدة حبة مهارات علشان تعرف تبدأ وتكسب منها.

3- مجال العمل الحر

العمل الحر أنك تشتغل عند حد أو تساعده بس أونلاين، والأمثلة على كدة كتيرة جداً جداً، مثلاً (المصممين – المبرمجين – الكتاب – صناع الفيديو – مديرين مواقع التواصل – مساعد أو سكرتير أونلاين) وغيرهم كتيييير.

كل دي حاجات الناس بتحتاجها وبتطلبها من كل مكان في العالم، فلو عندك مهارة معينة وعارف أن عليها الطلب في السوق ممكن تستفيد منها كويس وتدخل لنفسك ربح حلو.

طبعاً أكيد بتسأل ازاي تجيب عملاء وازاي تاخد منهم الفلوس و كل الحاجات دي – المرة دي بقى هقولك على طول علشان ده موضوع مهم جداً.

بص يا برنس/ برنسيسة، العمل الحر ده حوار كبير وعلشان كده احنا عملنا كورس كامل شامل مجاني بيشرح كل حاجة من الألف إلى الياء، هتلاقيه في الرابط التالي.

كورس العمل الحر

وكمان المصادر اللي جاية دي هتساعدك جداً

تمام كدة… نصيحتى بقى اوعى تفتح أي لينك دلوقتي، خليك مكمل معايا بس، لأن فيه معلومات هتحتاجها قبل كل اللي فات ده، متستعجلش، بينا على المجال اللي بعده!

4- مجال الخدمات المصغرة

ممكن تكون سمعت عن مواقع المراجعات زي (Yougov أو User testing) أو غيرها – وبالمناسبة المواقع دي كلها اي كلام واوعي تشتغل عليها، انا بس بستخدمها لأنها للأسف مشهورة.

الخدمات المصغرة دي هي نوع من أنواع العمل الحر، بس بتعمل حاجات بسيطة زي:

  • مراجعة المواقع والتطبيقات علشان تشوف لو فيها عيوب أو حاجة.
  • عمل تفريغ للمحتوى الصوتي.
  • ترجمة أو كتابة بعض النصوص البسيطة.
  • مراجعة نتائج محركات البحث لتحسينها.

صراحة المجال ده أنا لا أنصح بيه اطلاقاً لأن أرباحه قليلة جداً جداً، وكمان المنافسة فيه كبيرة نوعاً ما، وممكن تاخد شوية وقت علشان تعمل يدوب 50 دولار منه.

بس متقلقش برده هعرفك على شوية مواقع كويسة في المجال ده وموثوق فيها ممكن تساعدك تجمع مبلغ مش بطال… ولو كنت شاطر وناصح ممكن تطور نفسك وتتعلم مهارة كويسة مع الوقت.

5- مجال الأوراق المالية

طبعاً انت عارف أن فيه حاجة اسمها البورصة والمضاربة في اسهم الشركات، وممكن كمان تكون سمعت عن الـ Forex الي هي التجارة في العملة وكمان العملات الرقمية زي البيتكوين.

ده مجال كبير أوي ومهم بس مش هنتكلم عنه هنا، ولا أنصح بيه لأنه بيحتاج رأس مال كبير وخبرة… وانت مبتدئ وطالما مسمعتش عنه قبل كدة يبقى خليك كده أحسن.

لكن لو حابب تجرب، ومصر انك تدوس في الحوار دا فأنصحك تجرب مع شركة FBS.

في المستقبل هتعرف كل حاجة عن المجال ده خصوصاً لو بقى معاك شوية فلوس كدة حلوين وعايز تتعلم وتضيعهم 😂😂… ساعتها هتلاقي هنا على الرابحون كل المعلومات اللي هتحتاجها في المجال العملاق ده.

ازاي تبدأ في أي مجال من المجالات اللي فاتت دي صح

طبعاً أنت عايز تعرف ازاي تبدأ في أي مجال من المجالات دي وأكيد عندك أسئلة كتير (زي مثلاً هستلم فلوسي ازاي)… انا عارف انت بتفكر في ايه 😉.

بص يا صاحبي، علشان تبدأ صح كدة أنصحك تقرأ كل مقال من اللي هحطلك اللينكات بتاعتها هنا دي بالترتيب، وكمان هقولك هتستفيد منها ايه:

أساسيات الربح من الإنترنت (مقال سيختصر لك الكثير)

(هنا هتعرف ازاي تستلم فلوسك – ازاى تتعامل اونلاين وتدور و تبحث عن العروض والمعلومات صح).

9 مفاهيم عليك استيعابها جيداً لكي تحقق الربح من الانترنت

(هنا هتتعرف على شوية مصطلحات كده بتتكرر في كل مجال تقريباً، ولازم تكون فاهمها كويس)

طرق الربح من الانترنت (فرص حقيقية لتغيير حياتك في 2020)

(هنا هتاخد فكرة عامة أوضح عن الربح من الإنترنت بشكل مفصل أكثر بالأمثلة، وكمان هتتعرف على طرق زي الربح من انستجرام والربح من جروبات الفيسبوك وكمان الربح من أدسنس و الربح من اليوتيوب وغيرها).

العمل على الإنترنت (31 طريقة مختلفة لتبدأ في 2020)

(الدليل هيخليك تكتشف شوية أفكار ومواقع كتيرة جداً للربح زي مواقع بيع الصور وأشهر مواقع الخدمات المصغرة زي Rev و غيرها).

اوعى تفتكر أن المقالات اللي فوق دي كتير أو هتاخد منك وقت، كل دليل أو مقال يخلص في 10 دقائق، وأعتقد إن 40 دقيقة أو حتى ساعة مش كتير على مستقبلك وتحسين حياتك للأفضل.

كمان الأدلة اللي فوق دي هتلاقي فيها كل الأدوات والمعلومات اللي ممكن تحتاجها، يعني مثلاً:

وغيرها كتير من المعلومات والشروحات والأدوات… مش قلتلك كل اللي هتحتاجه هتلاقيه في الرابحون، يلا بينا نكمل على المرحلة المهمة جداً اللي جاية دي.

قارن بين طرق الربح المختلفة (أسرع الطرق)

انا عارف إنك ممكن تكون بتفكر دلوقتي في أسرع الطرق للربح من كل الأمثلة اللي ضربتهالك قبل كدة، النقطة دي مهمة جداً علشان كدة حبيت أوضحالك لوحدها.

خلينا نتكلم بصراحة، أكيد في طرق للربح أسرع من غيرها، خليني أوضحلك بأمثلة:

  • الربح من الإعلانات مثلاً عن طريق اليوتيوب (الموضوع ده هياخد وقت ومجهود عقبال ما تعمل محتوى والناس تتابعك وتثق فيك و تتخطى شروط الربح من اليوتيوب).
  • الربح من العمل الحر هيحتاج برده شوية وقت عقبال ما تبدأ تلاقي أول عميل ليك، وبعد كده العملاء تبدأ تزيد شوية بشوية وتحقق دخل ثابت.
  • الربح من التجارة الإلكترونية بقى وخصوصاً الدروب شيبينج ممكن يكون أسرع بكتير… خصوصاً لو هتعتمد على الإعلانات زي إعلانات فيسبوك الممولة و اعلانات جوجل.

ممكن تكسب فلوس من التجارة الالكترونية في نفس اليوم اللي هتبدا فيه (طبعاً انا بقول ممكن علشان متفتكرش أنه شيء أكيد، بالعكس ده فيه ناس بتخسر.

(احنا في الرابحون كدة على طول بنحب الصراحة والوضوح ومش بنضحك على حد 😊😊)

علشان كدة انا مش عايزك تدور على أسرع طريقة للربح وخلاص… لأن ده مش أفضل أسلوب تقارن بيه بين طرق الربح المختلفة.

على فكرة أنا عارف انك ممكن يكون عندك ظروف ومحتاج تحقق ربح سريع من الإنترنت، انا كنت في يوم من الأيام مكانك… وعلشان كده بقولك الكلام ده.

المقارنة بين طرق الربح المختلفة ليها أسلوب تاني خالص هيخليك تقيم الطرق وتختار صح… يلا بينا أقولك تعمل كدة ازاي واحدة واحدة.

ازاي تختار طريقة الربح المناسبة ليك

علشان تختار الطريقة الصح المناسبة ليك لازم تبص على الإمكانيات اللي عندك، يعني مثلاً:

  • مجال دراستك
  • وظيفتك الحالية
  • خبرتك العملية في السوق
  • هواياتك المختلفة
  • شغفك واهتماماتك
  • وقت الفراغ بتاعك

كل حاجة من الحاجات دي ممكن تفتحلك سكة للربح من الإنترنت كويسة جداً اعتماداً على المجالات السابقة، خليني اديلك كام مثال عملي:

  • بتشوف حلقات عمرو نصوحي أو الكوير على اليوتيوب… ده غير طبعاً قنوات الطبخ اللي مفيش أكتر منها (كل ده مثال على المعلومات أو الخبرات أو الشغف بحاجة معينة)
  • متعرفش أي حد من أقاربك أو أصدقائك أو معارفك أو حتى على الإنترنت بيربح بس علشان بيعرف يستخدم برنامج مشهور (فوتوشوب – Solid Work – أوتوكاد – باور بوينت) واللي هو يعرفها بسبب حكم شغله أو دراسته.
  • الحسابات المنتشرة على انستجرام لناس بتحب تتكلم في مجال تطوير الذات أو النصائح وغيرها.

صحيح: بمناسبة انستجرام … اوعى تنسى تتابع حسابنا على انستجرام، هزعل جداً جداً منك انا كده… اوعى تنسى، كمان هتلاقي هناك حاجات هتعجبك 👍… وادي الرابط ياسيدي علشان متقعدش تدور.

https://www.instagram.com/alrab7on/

في أمثلة أكتر من كدة بس أعتقد أن الفكرة وصلتك… هي دي الطريقة اللي لازم تختار بيها وتقارن، و المفروض انك عرفت تعمل كدة ازاى، بس انا مش هسيبك برده.

هقولك على تمرين عملي كدة تعمله خطوة خطوة علشان تختار وتقارن، وكمان هعرفك فيه على شوية أفكار حلوة جداً هتساعدك.

التمرين ده انا كتبته قبل كده في مقال منفصل فيه كل التفاصيل والمعلومات… المقال ده هو “ماذا أحتاج لكي أبدا في الربح من الإنترنت (خطة الـ 7 خطوات )“.

المقال ده لو نفذت اللي فيه صح، وكان هو بس الحاجة الوحيدة اللي خرجت بيها من هنا أنا هكون مبسوط جداً جداً جداً ✌️✌️ … فياريت تسمع كلامي و تروح تبص عليه، بس طبعاً بعد لما تخلص الكلمتين اللي جايين دول👇.

اتعلم مهارة مش مجرد طريقة

حاجة مهمة جداً في ناس كتير مش بتاخد بالها منها وهي الفرق بين الطريقة والمهارة… خليني احكيلك مثال لواحد أعرفه:

الشخص ده لقى قدامه فرصة كويسة جداً أنه يكسب من التجارة الإلكترونية والبيع على الفيسبوك، وكان يعرف واحد صاحبه بيجيب ملابس باسعار جملة.

فبقى ينشر على الجروبات وبدأ يعمل صفحة ويروج للملابس وكان بيحقق أرباح كويسة جداً… فجأة الصفحات كترت والمنافسة زادت فبقى مش عارف يبيع حاجة.

ليه بقى لأن بقى فيه استراتيجيات جديدة وأهمها اعلانات فيسبوك اللي مكنش عارف يتعلمها أو يستغلها، ده غير أن فيه أساليب تسويقية كتير هو مكانش عارفها.

هو ده الفرق بقى من انك تبقى عارف طريقة وانك تتعلم مهارة وتحترفها… ساعتها هتحقق أرباح كتيرة جداً وكمان هتضمن أن الدخل يكون ثابت مهما اتغيرت الظروف.

علشان كدة عايزك تتعلم اللي بتشتغل فيه صح، يعني هتشتغل في التجارة يبقى تتعلم التسويق الرقمي صح، هتشتغل على يوتيوب يبقى تتعلم مهارة صناعة فيديو احترافي… وهكذا.

المهارة دي هتفتحلك سكك كتير… وهو ده اللي هقولك عليه في الخطوة اللي جاية👇.

استغل مهاراتك أو معرفتك بأكثر من طريقة للربح

أي طريقة للربح ليها أكتر من أسلوب، يعني مثلاً الربح من الإعلانات لو عندك موقع أو قناة على يوتيوب، انت ممكن تربح من:

  • اعلانات أدسنس
  • إعلانات الشركات اللي بنسميها (Sponsorship)
  • منصات الإعلانات المختلفة زي PropellerAds وغيرها.

علشان كدة لازم أي طريقة تشتغل فيها تبقى عارف كل البدائل والأفكار اللي فيها… ودا علشان متعطلش في أي يوم من الأيام وكمان علشان تزود ربحك.

حاجة تانية: أي طريقة أو مهارة تتعلمها انت ممكن تستغلها بأكتر من سكة، خليني اضرب مثال عملي كالعادة علشان الصورة توضح:

لو مثلاً اتعلمت مهارة التصميم، انت ممكن:

  • تشتغل على منصات العمل الحر.
  • تتعاون مع أصحاب الشركات و المحلات بشكل مباشر.
  • ممكن تبيع شغلك (الصور – التصميمات) على مواقع الـ Stocks الشهيرة زي Shutterstock وغيرها.
  • ممكن تعمل قناة على يوتيوب تقول فيها شوية نصائح و معلومات وتربح من اعلانات اليوتيوب.
  • ممكن تعمل كورس وتربح من أنك تساعد الناس تتعلم أساسيات المهارة بتاعتك.

فهمت قصدي، كل مهارة ممكن تساعدك، طبعاً الموضوع بيتوقف عليك، ممكن يكون معندكش وقت أو مش بتحب المسؤوليات الكتير أو أي سبب تاني.

بس أعتقد أنك فهمت قصدي وهو أن سكك الربح من مهارة معينة كتير جداً، خصوصاً لو كانت المهارة دي مطلوبة والناس بتدور عليها، علشان كدة أنا عاوزك تتعلم… وعلشان أساعدك عايزك تعمل حاجتين.

أولاً: اتعرف أكتر على أفكار الربح

اقرأ المقالات دي:

هتاخد فكرة عن الطرق اللي ممكن تستفيد بيها من أي مهارة، والأهم بقى انك تتعلم المهارات نفسها، وهي دي ثانياً.

ثانياً: اتعلم وطور نفسك

هتلاقي في الأدلة التالية مصادر رائعة تتعلم منها أي حاجة على الإنترنت:

وبكده تضمن لنفسك مكان على خريطة الإنترنت، وهتحقق دخل كويس جداً جداً بس لو تعبت واجتهدت شويتين.

ومش كده وبس، انا عايزك تتابعنا باستمرار، لأننا بنحضر مواضيع مهمة جداً هتعرفك تتعلم أهم المهارات المطلوبة في السوق زي البرمجة والتصميم بشكل عملي مرتب خطوة بخطوة.

كل ده من أفضل المصادر العربية والعالمية بحيث تفضل تتعلم على طول، وكمان تعرف ازاي تستغل المهارة بتاعتك بأمثلة عملية من أرض الواقع.

الخاتمة

انا مش عايز أطول عليك أكتر من كدة… أهم حاجة بس تبدأ وتنفذ اللي قلتلك عليه.

وكمان تبقى عارف إن الإنترنت ده مش مكنة فلوس… متخليش أي حد يضحك عليك ويفهمك أن فيه طريقة سحرية سرية خزعبلية هتخليك تعمل مئات الدولارات في يومين.

انا مش بقول انك مش ممكن تكسب مئات الدولارت في اليوم، يا معلم انت ممكن تكسب أكتر من كدة في ساعة… بس كل الطرق دي معروفة ومش سرية خالص.

بس علشان توصل للمستوى ده انت محتاج وقت ومجهود وخبرة… وأهم حاجة هو انك تتعلم وتحسن نفسك وتشغل دماغك علطول.

لو لسة عندك أي سؤال سيبه في التعليقات وان شاء الله هنرد عليك بسرعة.

بالتوفيق، وياريت لو كنت استفدت من المقال ده تشاركه مع غيرك.. الدال على الخير كفاعله… أشوفك قريب👋.

عن الكاتب

محمد نور

محمد نور، مهندس ومطور ويب
أعشق علم البيانات وأتعلم عنه الجديد كل يوم، ولأن التسويق الرقمي هو أهم تطبيق لاستخدام علوم البيانات وتطوير الويب أصبحت مسوق محتوى محترف.

أحب الكتابة - أتمنى أن تجد كتاباتي مفيدة وشيقة - وخصوصاً الكتابة الموجهة التي تهدف إلى تثقيف القارئ العربي بمعلومات واستراتيجيات عملية تساعده على تحقيق أهدافه. تلك التي ينشرها الرابحون باستمرار.

اليوم الذي يمضي بدون تعلم شيئاً جديداً لا أحسبه من عمري، لهذا أريدك أن تفعل مثلي وتكون أفضل وأكثر معرفةً كل يوم.

لهذا إحرص على متابعة الرابحون باستمرار حتى تستقي كل يوم معلومة جديدة، وإن كنت ترغب في التواصل يمكنك ذلك عن طريق صفحة اتصل بنا.

تعليقات

اضغط هنا لنشر التعليق